Día internacional do Cancro Infantil
O vindeiro 15 de febreiro conmemórase o Día Internacional do Cancro Infantil. A proposta dunha das familias asociadas, a directiva da ANPA Airiña decidiu organizar, en colaboración co CEIP Padre Feijoo, unha actividade de sensibilización sobre o cancro infantil no colexio o venres 12 de febreiro e a favor da Fundación Juegaterapia.
A Fundación Juegaterapia leva dende o 2010 traballando para que as nenas e nenos con cancro pensen só en xogar, procurando facer máis agradable e feliz a súa estancia nos hospitais. Os seus principais proxectos son a humanización dos hospitais, convertendo antigas e grises azoteas en preciosos xardíns para xogar, decorando zonas hospitalarias coma bosques, circos ou guaridas de superheroes, transformando as Unidades de Illamento en Estacións Lunares e as Unidades da Dor en Unidades de Cor, así como a de facerlles chegar videoxogos que lles permiten evadirse do illamento ó que soen estar sometidos.
As nenas e nenos do colexio, en colaboración co profesorado, escribirán unha carta ou farán un debuxo para enviarlle ánimos ás nenas e nenos que están nos hospitais recibindo tratamento contra o cancro. Estas mensaxes serán enviadas á Fundación Juegaterapia e compartidas nas redes sociais. Ademais, as nenas e nenos que queiran facer unha pequena aportación económica poderán levala á clase o venres 12 de febreiro nun sobre pechado. Os cartos recollidos serán entregados, xunto con 300 € aportados pola ANPA, á Fundación Juegaterapia para que poidan seguir desenrolando os seus proxectos.
Tamén se colaborar directamente coa Fundación polos medios que detallan na súa web. A súa campaña máis coñecida é a dos “BabyPelones”, pero tamén se pode facer ingreso na súa conta, doar a través de sms, bizum, etc.
Aquí tedes algúns dos seus vídeos, nos que presentan a fundación e explican algúns dos seus proxectos:
La quimio jugando se pasa volando
BabyPelones de Juegaterapia
La alegría también cura
